22 fevral tarixində Bakıda SIMOORG Akademiyası tərəfindən təşkil edilən “Phoenix Rebirth Show” moda nümayişi baş tutub. Tədbir Yves Saint Laurent Beauty brendinin xüsusi əməkdaşlığı ilə reallaşıb və Azərbaycanın Eurovision təmsilçisi Elnur Hüseynovun canlı musiqisi fonunda təqdim edilib. Musiqinin canlı ifası gecəyə unikal atmosfer bəxş edib.
Moda nümayişində xüsusi qonaq qismində çıxış edən dizayner Leyli Zalova tədbirə öz imzasını atıb. Onun “Leya Couture” brendi üçün hazırladığı kolleksiya iştirakçılar tərəfindən böyük maraqla qarşılanıb. “Phoenix Rebirth Show” layihəsinin təşkilatçı dəstəkçiləri və tərəfdaşları arasında Yves Saint Laurent, Martini, Azərfoto Xalça və Buro246 yer alıb.
Leyli Zalova “Leya Couture” brendinin qurucusu və kreativ direktorudur. O, eyni zamanda, 2019-cu ildə Azərbaycanın yerli istehsal sahəsində fəaliyyət göstərən azsaylı brendlərdən biri olan Dably Baku firmasını təsis edib. Kreativ dizayner kimi fəaliyyət göstərən Leyli Zalova moda və dizayn sahəsində innovativ yanaşmaları ilə seçilir. O, yalnız yerli bazarda deyil, beynəlxalq platformalarda da Azərbaycanı uğurla təmsil edir.
2019-cu ildə Moskvada keçirilən Mercedes-Benz Moda Həftəsində özəl kolleksiyasını təqdim edib. 2023-cü ilin iyun ayında isə Milan Moda və Dizayn Akademiyasında “Del Lusso” akademik kursuna qatılıb. Bundan əlavə, 2019-cu ildə keçirilən “Miss & Mister Planet 2019” beynəlxalq gözəllik müsabiqəsinin milli finalında münsiflər heyətində yer alıb.
Leyli Zalovanın dizaynları həm yerli, həm də beynəlxalq səviyyədə böyük maraqla qarşılanır. “Leya Couture” brendi ilə o, təkcə Azərbaycanda deyil, dünya moda sənayesində də öz mövqeyini möhkəmləndirməkdədir.