Leyla Babayeva 30 mart 2000-ci ildə anadan olub. O, 3 yaşından etibarən rəssamlıqla məşğul olmağa başlayıb və gənc yaşlarından Azərbaycan daxilində və beynəlxalq sərgilərdə iştirak edib. 2012-ci ildə Parisdə keçirilən sərgidə çıxış etmiş, elə həmin il Bakıda tanınmış rəssamlarla birgə əsərlərini sərgiləmişdir. Rəssamlıq sahəsində qazandığı uğurlar nəticəsində 60-dan çox diplom və beynəlxalq nailiyyətlərə sahib olub, müxtəlif yarışmalarda birincilik qazanıb.
Orta təhsilini fərqlənmə ilə bitirdikdən sonra, moda və dizayn sahəsində ixtisaslaşmaq məqsədilə əvvəlcə Londonda bir il foundation təhsili alıb, daha sonra İtaliyanın dünyaca məşhur Istituto Marangoni universitetində moda və dizayn üzrə təhsil alıb. Təhsil dövründə yaradıcılığı və akademik göstəriciləri ilə fərqlənən tələbələrdən biri olub. Xüsusilə, plastik şüşələrdən hazırladığı çanta dizaynı böyük uğur qazanıb, çünki layihəsi ekoloji problemlərə diqqət çəkməsi və davamlı moda konsepsiyasına uyğunluğu ilə ön plana çıxıb.
Leyla Babayeva, italyan lüks geyim, ayaqqabı və dəri məmulatları markası olan Tod’s üçün kapsul kolleksiya hazırlayıb. Bu kolleksiya Tod’s-un “Re-Generation” layihəsi çərçivəsində yaradılmışdır. Layihəyə Istituto Marangoni moda məktəbindən seçilən 20 gənc dizayner qatılmışdır və iştirakçılar arasında İtaliya, Azərbaycan, Tayvan, Hindistan, Çin, İran və Braziliyadan dizaynerlər yer alıb. “Re-Generation” layihəsinin məqsədi davamlı inkişafı təşviq etmək və ekoloji cəhətdən təmiz materiallardan istifadə edərək moda sənayesində yeniliklərə imza atmaqdır.
Bundan əlavə, Leyla Babayeva Dior və UNESCO-nun birgə təşəbbüsü olan “Women@Dior & UNESCO 2025/2026” mentorluq proqramına seçilib. Bu proqram qadınların gücləndirilməsi, liderlik bacarıqlarının inkişafı və cəmiyyətə müsbət töhfə verməsi üçün yaradılmışdır. Seçim prosesi olduqca rəqabətli olub və 60-dan çox ölkədən müraciət edənlər arasından yalnız 150 nəfər iştirak hüququ qazanıb. Leyla Babayeva üç mərhələli müsahibə prosesindən uğurla keçərək bu proqramda yer alıb.
O, Circular Design Challenge (CDC) beynəlxalq moda müsabiqəsinin Avropa finalına yüksəlib. Milan şəhərində keçirilən yarışmada məşhur heykəltəraş Bruno Catalano-dan ilhamlanmış “Turn Your Imagination ON” kolleksiyasını təqdim edib. Layihəsi davamlı moda prinsiplərinə əsaslanır və Azərbaycan sənətkarlıq ənənələrini vurğulamışdır.
“Women@Dior & UNESCO” mentorluq proqramı yalnız qadın iştirakçılar üçün nəzərdə tutulub və müxtəlif sahələrdən olan istedadlı qadınları bir araya gətirir. Layihə çərçivəsində qadın həmrəyliyi və ətraf mühitin qorunması əsas mövzulardan biridir. 2025-ci ilin aprelində başlayacaq proqram çərçivəsində o, ilhamverici mentorlarla işləyəcək, liderlik təlimlərində iştirak edəcək və müxtəlif ölkələrdən olan istedadlı qadınlarla əməkdaşlıq edəcək. Qlobal Konfrans Parisdə keçiriləcək və burada Dior və UNESCO nümayəndələri, mentorlar, Dior-un kreativ direktoru Maria Grazia Chiuri də iştirak edəcək.
“Women@Dior & UNESCO” mentorluq proqramı 2017-ci ildən bəri 60-dan çox ölkədə 2000-dən çox gənc qadına dəstək olub. Proqram iştirakçılarına onlayn kurslar, sənaye liderlərindən mentorluq və Dior-dan peşəkar təlimlərə çıxış imkanı yaradır. Eyni zamanda, iştirakçılar öz bacarıqlarını inkişaf etdirmək və icmalarına müsbət təsir göstərmək üçün sosial layihələr həyata keçirmək imkanı əldə edirlər. Leyla Babayeva həm moda, həm də ekoloji dayanıqlılıq sahəsində yaratdığı innovativ layihələrlə tanınır və beynəlxalq səviyyədə Azərbaycanı uğurla təmsil edir.